فى ليلة شتا متلجة ومحصلتش وقبل منها كده زيها ليلة ماجـتش
ناديت زينة حبيبتى تعالى وحمزه ياقلبى يلا تحت الباطنية خــــش
يلا ندفى بعضنا فى حضننا واحكيلكم حدوتة قبل كده مااتحكيتــش
قالولى حاتحكي لينا حدوتة جديدة يابابا والا حاتضحك علينا وتغش
قلتلهم حبايبى ماليش فى الهمبكة .ووعدى ليكم إزاى مايحصلش
قالولى إحكى يابابا لحسن الدنيا برد موت والليل طويل مابيفوتـش
قلت حاحكي حدوتة واحدة بيقولو عليها عجوزة لكن زيها ماحصلش
الست دى حبوها ناس كتير والطمعانين فيها سواد قلوبهم ماتوصفش
بيقولوا عليها ام الدنيا وحاتبقا اد الدنيا ومن غيرها الدنيا ماتلزمش
من يومها والطمعانين كتير لكن عشان قلبها كبير عليها حد مايقدرش
فى ناس خدوا بايدها وزينوها وخلوا فرحانة وراسها مرفوعة ماتنزلش
وخلوها من ال(جمال)) بقت من ((سادات)) الستات ودايما على العرش
بس دول قدموا لها مهرها سهر وكفاح ودم وروح وثورة بجد انا مابهزرش
عشان كده شالتهم فى قلبها ويوم بعد اليوم ماكنتهم عندها ماتتأثرش
وفى يوم سواده اسود من الليل والقمر غايب جالها ناس فعلا ماتلزمش
بهدلوها بين الخلايق وعجزوها وكسروا بخاطرهاقبل اوانها اللى ماآنش
غيبوا الشمس عنها وطيروا الغربان فى ليلها ونواح وعويل وكلام مايتقلش
وكانوا عايزين الهم يبقا ((مرسى))ليها لكن ولادها بالكلام ده ماتقبلش
قاموا قومة ((30 ))مليون شاب وشابة فى يونية واليوم ده مااتوصفش
سجنوا الغربان وزاحوا بهمتهم الغمام ورسموا طريق قبلها مااترسمش
وقالوالهاياامنا يامصرنا يااحلا حاجة فى عمرنا..عمرك ماتموتى ولاتغلبى.
انت الشابة الطيبة اللى ربك فى السما عن ذكرك فى كتابه ماغفلش.
أبوحمزه
007
MZ —
ليست هناك تعليقات:
إرسال تعليق