حلمى الصغير انى اطير

حلمى إنى أطير.

كل طفل صغير ..

كان بيحلم يكون له جناح ويطير.

وأنا طبعا كنت ..

زيى زى باقى الاطفال الكتير.

بحلم أكون حمامة أوعصفورة من العصافير.

ففيوم كنت فى البيت ولوحدى..

وفى غرفتى وفوق سريرى الصغير.

والمروحة فى السقف بتجيب هوا ..

ومنظرها وهى بتلف خطير.

فافتكرت نفسى فرافيرو..

ومن غير جناحات ممكن بسهولة اطير.

وهوب وفردت دراعاتى ..

وقلت فرافيرووووو..

ونطيت من فوق السرير. 

واتشعلقت فى ريشة مروحة السقف وهى بتلف..

واتمرجحت وأنا رابط فى رقبتى شال حرير.

عشان بقلد فرافيرو فار الكرتون الشهير .

طبعا ماأنا فرفور شقى من الالاف الفرافير.

وطبعا كانت النتيجه ..

انى لونى بقا ازرق من الخضة..

و أخدت الدرس الكبير.

وانا نازل بالمروحة كلها على الارض ..

وانا مخطوف ..

من شكل الشرر الكهربائى وصوت الصفير.

ورحمة الله على امى الاميرة وأبى الطيب الأمير.

لما رجعوا ولقوا المروحة على الارض ..

وانا نايم مستخبى تحت السرير.

كل كلامهم الف سلامة عليك ..

وفى ستين داهية المروحة ..

وربك عالم حليم و قدير.

ودى كانت نهاية حلمى الصغير..

انى ممكن فى يوم من الايام ..

أفرد جناحاتى وأطير.

محمدزكى 

أبوحمزه

M.Z

007